Flere språk til flere – Eanet gielat eambbogiidda

Gaskkustanbálvalus Romssa universitehtas
Flere språk til flere lea čadnojuvvon Edinburgh universitehta diehtojuohkinbálvalussii Bilingualism Matters. Dán bálvalusa hovde Professor Antonella Sorace, gii lea njunuš guovttegielatvuođadutki. Sorace lea maiddái Professor 2 Romssa universitehtas áigodagas 2009-2012.

 

Norga – máŋggagielat servodat
Norga lea dán áigge máŋggagielat servodat, ja Norgga giellaráđi, Språkrådet, mielde hubmojit badjel 100 iešguđetlágan giela Norggas. Norggas leat dušše 4,5 miljovnna ássi, ja dát gielalaš girjáivuohta láhčá dili kultuvrralaš girjáivuhtii ja ekonomalaš vejolašvuođaide. Ollu sajiin máilmmis lea dábálaš ahte mánát bajásšaddet guvttiin- golmmain gielain riegádusa rájes juo. Eanas osiin Eurohpás lea dattetge guovtte- ja máŋggagielatvuohta oalle ođas. Bajásšaddat guvttiin dahje mottiin gielain adnojuvvo dan dihte erenoamážin, ja vaikko vel vahágin nai máná ovdáneapmái, ja máŋggagielatvuohta dávjá ipmirduvvo negatiivvalažžan. Nu geavvá go olbmuin eai leat doarvái dieđut guovttegielatvuođas. ‘Flere språk til flere’ háliidivččii buhttet dán dili go juohká dieđuid álbmogii guovtte- ja máŋggagielatvuođa ovdamuniid birra, ja go movttiidahttá váhnemiid, oahpaheddjiid ja politihkkáriid doarjut mánáid máŋggagielat ovdáneami.

Máŋggagielatvuođa ovdamunit
Ođđa dutkamat čájehit ahte guovttegielatvuohta dávjá váikkuha positiivvalaččat máná ovdáneapmái. Mánát geat gullet moadde giela beaivválaš dilis ipmirdit buorebut iešguđetlágan kultuvrraid ja eará olbmuid oaiviliid.  Sii leat maid dávjá čeahpibut bargat mottiin áššiin oktanis, go ovttagielat mánát (multitasking), ja doalahit fuomášumi dihto áššis. Dávjá sii ohppet lohkat árabut ja leat čeahpibut oahppat ođđa gielaid. Dát mearkkaša ahte guovttegielatvuohta addá mánáide ollu eambbo go dušše guokte giela!

Dás sáhtát lohkat eambbo guovttegielatvuođa ovdamuniid birra, New York Times artihkkalis.

Min logo
Min logo čájeha máná gii dadjá ‘hei’ njealji gillii. Son ovddasta buot mánáid Norggas geat bajásšaddet mottiin gielain. Mánná lea movttet oaidnit, iige leat ollenge seahkánan máŋggagielatvuođainis. Son diehtá baicca ahte dat lea mávssolaš attáldat!

Logos livčče sáhttán leat eambbo gielat, muhto mii leat válljen njeallje giela mat hubmojit Romssas:  dárogiella (hei), davvisámegiella (bures), ruoššagiella (privet) ja arábialašgiella (marhaba). Elisabetta Wolleb lea sárgon dan máná mii lea min logos.

This post is also available in: English, Russian, Norwegian Bokmål