Sátnegirjeprošeakta Spánska-sámi-spánska sátnegirjji

Raporta Kjell Kemis, Humanistalaš fakultehta, Romssa universitehta
Áššenr. 200601873-45

Ekonomalaš doarjja sátnegirjeprošektii Spánska-sámi-spánska sátnegirjji

Prošeakta ja dan ulbmil
Letne ovttas professor Angel Diaz de Radain, Madrid Universitehtas, álggahan sátnegirjeprošeavtta Spánska-sámi-spánska sátnegirjji. Moai álggaheimme ovttasbargoplánaid 2002 ja letne joatkán deaivvademiiguin 2003, 2004 ja 2005. Easkka 2004 beasaime álgit sátnegirjeprošeavttain. Moai letne juogadan bargguideame nu ahte son čoaggá materiála sámegielas spánskkagillii, mun fas spánskkagielas sámegillii.

Moai čogge sátnehivvodaga sátnegirjeprošektii, ja ávkkástalle, ovddidetne ja lasihetne bargguideame go deaivvadetne, maŋimus čakčat 2006.

Dát bargu gullá globaliseremii, eamiálbmotperspektiivii, giellapolicyii, giella- ja kultuvrarasttideaddji ovttasbargui.

Mátki
Mun ledjen ohcan 44 400,- kruvnna Sámi Dutkamiid Guovddážis ja ožžon dušše 10 000,-. Dat gáržžideapmi dieđusge gáržžida sakka munno barggu ja ovdáneami, go leimme jurddašan golmma geardde deaivvadit. Dál fertejetne hilgut dáid plánaid ja ean olat dán jagi nu guhkás go leimme jurddašan ja plánen. Dat mearkkaša ahte moai fertejetne guođđit stuorát oasi čuovvolahttima ja maŋŋebargguid.

Mun vulgen duorastaga 05.10.2006 Tromssas ja máhccen 16.10.2006 fas Tromsii. Moai doalaime čoahkkimiid Madridas, gos guorahalaime dieđuid, maid leimme dán rádjái čohkken. Moai kvalitehtasihkkarasttiime bargguideame, diđošteimme sátnegirjjiid ja gálduid, divodeimme ja lasiheimme materiála ja ságastalaime ovddasguovllu plánaid.

Ođđa áiggi sátnegirji sisttisdoallá maiddái giellaoahpu, omd. dohko lasihit substantiivvaid, vearbbaid, adjektiivvaid, adverbbaid, konjunkšuvnnaid ja partihkkaliid. Dasa lassin gullet maiddái sojahanminstarat, paradigmmat jna. Dohko muhtumat lasihit báikenamaid. Sámegielas leat valjis suorggiduvvon sánit. Dat addet stuorra vejolašvuođa ođđa áiggis, omd. dain sáhttá ráhkadit ođđa sániid, dan sadjái go loatnasániid geavahit. Nubbi sátneráhkadanvuohki guoská goallossániide.

Kjell Kemi

This entry was posted in Researcher and tagged , , , , , . Bookmark the permalink.

Leave a Reply

Your email address will not be published. Required fields are marked *