Sámi dieđalaš áigečála – fágaguoibmeárvvoštallojuvvon dieđalaš áigečála sámegillii
Sámi dieđalaš áigečála lea sámegiel máŋggafágalaš dieđalaš áigečála mii almmuha dieđalaš artihkkaliid, girjeárvvoštallamiid ja doavttirgrádalogaldallamiid sámi servodaga, kultuvrra, giela, historjjá ja eará sámi ja eamiálbmogiid guoski fáttáid birra. Áigečállaga almmuhit Sámi allaskuvla ja UiT Norgga árktalaš universitehta Sámi dutkamiid guovddáš ovttasbarggus. Vuosttaš nummar ilmmai 1994:s.
Sámi dieđalaš áigečála lea dieđalaš áigečállagiid ja lágádusaid Norgga registaris dohkkehuvvon almmuhankanálan 2. dásis, ovdamearkka dihte Cristin-vuogádagas. Suoma publikašuvdnaregistaris lea Sámi dieđalaš áigečála dásis 1.
Sámi dieđalaš áigečállaga doaimmahusgoddi bovde čálliid sáddet dieđalaš artihkkaliid ja eará namuhuvvon čállosiid Sámi dieđalaš áigečállagii, ja daid sáhttá sáddet sisa miehttá jagi.
Artihkkalat galget čállot man nu sámegillii, ja dat eai galgga leat jorgaluvvon eará gielain. Artihkkalat galget hábmejuvvot dárkilit Sámi dieđalaš áigečállaga čállinrávvagiid mielde. Artihkkalat sáddejuvvojit doaimmahusčállái.
Sámi dieđalaš áigečála lea 2023 rájes sirdimin WordPress neahttasiidduin Septentrio Academic Publishing neahttasiidduide (UiT Norgga árktalaš universitehta almmuhanbálvalus). Buot Sámi dieđalaš áigečállaga sisdoallu sirdojuvvo dađistaga Septentrio geavahanvuogádahkii. Gaskaboddosaččat leat ain ovddeš almmuhuvvon nummirat ja eará dieđut olámuttus áigečállaga WordPress neahttasiidduin. Sámi dieđalaš áigečállaga Septentrio neahttasiiddut galget ollásit jorgaluvvot davvisámegillii go prográmma geavahanlakta davvisámegiela várás lea ráhkaduvvon.
Starting with 2023, Sámi dieđalaš áigečála is moving from its WordPress website to Septentrio Academic Publishing (a publishing service at UiT The Arctic University of Norway). All of the content will gradually be transferred to Septentrio. For the time being, you can still find a full overview of the issues and other journal information on Sámi dieđalaš áigečála’s WordPress website. Sámi dieđalaš áigečála’s Septentrio website will be fully translated to Northern Saami, when the programme’s interface for Northern Saami is developed.