Ođđasat

Skábmamánnu 2017

Norgga Dutkanráđi bealis loahpahuvvo prošeakta 2017 loahpas. Romssa Universitehta dattege joatká prošeavtta ain viidáseappot, sihke materiálačoaggima ja dutkama.

Mii ohcát ain bearrašiid CDI prošektii. Váldde áinnas oktavuođa, jus orru miellagiddevaš searvat min dutkamiidda.

______________________________________________________________

Čakča 2015

CDI-prošeakta

Jagiid 2012 ja 2013 mii čađaheimmet CDI-teasttaid álgoiskkadeami. Go álgoiskkadeapmi lei čađahuvvon, de buorideimmet skoviid oassálasti váhnemiid vásáhusaid ja kommeanttaid vuođul. Dál leat buoriduvvon skovit gárvánan, ja mii ohcat  davvisámegielat smávvamánnábearrašiid geain leat mánát gaskkal 12 mánu ja 36 mánu.

______________________________________________________________

Čakča 2013

CDI-prošeakta

Mii leat čađahan CDI-prošeavtta vuosttaš deavdináigodaga. Vuosttaš deavdináigodaga ulbmilin lei iskat man álki lea ipmirdit skoviid ja man deaivilat dat leat.

Dán vuorus lei vejolaš kommenteret skovi, man ipmirdahtti dat lea ja man deaivil dat orru leame máná giela ektui. Buot oasseváldi bearrašiidda fállojuvvui okta čuovvolanságastallan deavdima oktavuođas. Dát fállojuvvui njuolga maŋŋil vuosttaš deavdima. Dalle sáhtii jearrat skovi birra ja kommenteret jus juoga lei váttis.

Skovit divvojuvvojit váhnemiid kommentáraid mielde vuosttaš deavdináigodaga maŋŋil. Dainna leat dál bargame. Dasto álggahuvvo nubbi deavdináigodat. Dan vurrui dárbbašuvvojit eambbo bearrašat. Sii galggašedje deavdit goit ovtta skovi máná nammii. Áinnas eambbo, jus lea dilli ja beroštupmi.

______________________________________________________________

Korpus

Mii leat ceggeme davvisámegiel mánáidgielkorpusa. Mánát báddejuvvot lunddolaš dilálašvuođain. Dat báddemat transkriberejuvvojit, ja dat transkriberejuvvon materiála šaddá de mánáidgielkorpusin.

Korpus oasis leat mis vihtta máná mielde:

  •  Nigá, 3;6-5;6
  •  Isko, 2;5-4;10
  •  Jussá, 1;5-2;0
  •  Ailo, 0;9-1;1
  •  Biggá, 2:0-3;1

Korpusis leat ságastallamat ovttaskas mánáid ja rávisolbmuid gaskkas. Ságastallamat báddejuvvojit stoahkandilálašvuođain ja eará beaivválaš oktavuođain (nugo borramiid, divššu ja sullásaš oktavuođain). Čohkkejuvvon giellamateriála vuođul iskat dihto beliid mánáid giellaovdáneamis, ja dakko bokte gávnnahit movt davvisámegiella ovdána mánáin.

______________________________________________________________