Korpus

 

Davvisámi mánáidgielkorpus

Dán vuolleprošeavttas mii cegget davvisámegiel mánáidgielkorpusa (čoakkáldaga). Mánát galget báddejuvvot lunddolaš dilálašvuođain. Dat báddemat dasto transkriberejuvvojit, ja dat transkriberejuvvon materiála šaddá de mánáidgielčoakkáldahkan dahje korpusin.

Korpusis galget leat ságastallamat ovttaskas mánáid ja rávisolbmuid gaskkas (juogo sin váhnemat dahje prošeavtta dutkanassisteanta). Ságastallamat báddejuvvojit stoahkandilálašvuođain ja eará beaivválaš oktavuođain (nugo borramiid, divššu ja sullásaš oktavuođain). Čohkkejuvvon giellamateriála vuođul dutkit isket dihto beliid mánáid giellaovdáneamis, ja dakko bokte gávnnahit movt davvisámegiella ovdána mánáin.

Maid searvan mielddisbuktá:

Dán vuolleprošektii mii ohcat váhnemiid, geain leat mánát gaskkal 1,5 – 5,5 jagi.

Mii ohcat sámi bearrašiid geain lea sámegiella ruovttugiellan, geat sáhtáše čuovvut korpus-oasi guhkit áiggi,  áinnas guokte-golbma jagi. Jus searvabehtet dása, de din mánná báddejuvvo jeavddalaččat (váhnemat juogo ieža báddejit, dahje bádden šihttojuvvo prošeaktabargiiguin).

Báddemiid dávjodat:

  • go mánná lea vuollel 2,5 jagi: 30 minuhta vahkkus
  • go mánná lea gaskkal 2,5-4 jagi: 45 minuhta guktii mánus
  • go mánná lea badjel 4 jagi: 45 minuhta oktii mánus