Searvat CDI-prošektii

MacArthur-Bates’ Communicative Development Inventory (CDI) lea giellakártenreaidu. Dán reaiddus leat guokte skovi mat isket mánáid árra kommunikatiivvalaš ovdáneami. Váldoáššin lea máná giella, sihke dat maid mánná ipmirda ja dat maid mánná ieš dadjá.  Váhnemat devdet skoviid ja sii galget earret eará merket makkár sániid mánná ipmirda ja dadjá.

Eambbo dieđut skoviid birra.

Mii ohcat bearrašiid geain leat mánát gaskkal 12 mánu ja 3 jagi ja sámegiella ruovttugiellan. Mii ohcat sihke ovtta- ja máŋggagielat bearrašiid. Jus mánná lea guovttegielat, de livččii buorre jus dat vázzá sámegielat mánáidgárddis.

Oasseváldi bearrašiidda sáddejuvvo skovvi (báberhámis).

Deavdinmolssaeavttut:

  1. Bearaš deavdá ovtta skovi.
  2. Bearaš deavdá skovi juohke goalmmát mánu, nu guhká go ieža áigot.
  3. Bearaš deavdá skovi juohke jahkebeali: 1 jagi, 1,5 jagi, 2 jagi, 2,5 jagi ja 3 jagi

Mii čoaggit dieđuid čuovvovaš agiide (mánuid mielde), ja skovit devdojuvvojit dalle go mánná lea ná boaris:  12, 15, 18, 21, 24, 27, 30, 33, 36

Livččii buorre jus deavddášeiddet moadde skovi máná nammii, iešguđet agiin. Devdojuvvon skovit sáddejuvvojit midjiide boastta mielde.

Bearrašat čuvvot CDI-prošeavtta gaskkal guhtta mánu ja badjelaš guokte jagi, dan mielde man boaris mánná lea go searvá prošektii, ja dan mielde man guhká bearrašat ieža háliidit. Mii sávvat ahte buot bearrašat sáhtášedje deavdit unnimusat guokte skovi, muhto mii leat diehttalasat giitevaččat buot skoviid ovddas mat devdojuvvojit.

Skovit vurkkoduvvojit báberhámis nu guhká go prošeakta bistá. Váhnemat sáhttet daid oažžut ruovttoluotta, jus ieža sihtet.

Searvan lea eaktodáhtolaš, ja buot oasseváldit sáhttet vaikko goas prošeaktaáigodagas geassádit prošeavttas, almmá ákkaid haga.

Áiggošeiddet go searvat?

Váldde oktavuođa:

kristine.bentzen@uit.no

Berit-Anne-Bals.Baal@samiskhs.no, tlf. 905 47 317

Go leat ožžon doarvái skoviid guhtege ahkái, de galgat skoviid vuođul ráhkadit giellaovdáneami norpmaid.