Duogášdieđut

 

DASAGO (Davvisámegiel mánáid giellaovdáneapmi) lea stuorát dutkanprošeakta Romssa universitehtas. Dat álggahuvvui suoidnemánu 2011. Prošeakta lea ožžon ruhtadeami Norgga dutkanráđis, 7 miljovnna NOK. Dasa lassin lea prošeakta maid ožžon 250.000 NOK seastinbáŋkku skeaŋkkafoanddas (sparebankens gavefond). Norgga Dutkanráđi bealis loahpahuvvo prošeakta 2017 loahpas. Romssa Universitehta dattege joatká prošeavtta ain viidáseappot, sihke materiálačoaggima ja dutkama.

 

DASAGO-Prošeavttas leat golbma váldooasi:

1. Ovdánahttit dutkan- ja kártenneavvuid davvisámegielat mánáid giellaovdáneapmái (CDI-skovit, gč. CDI bajit holggas).

2. Guorahallat movt davvisámegielat mánát oččodit giela (Dasa mii dárbbašit báddet mánáid, gč. Korpus.)

3. Juohkit dieđuid davvisámegielat mánáid giellaoččodeami birra ásahusaide maidda dát dieđut leat deaŧalaččat (nugo mánáidgárddit, skuvllat ja dearvvašvuođasuorgi)

 

CDI- skoviid heiveheapmi davvisámegillii – oanehaččat:

Davvisámegiel skoviide leat válljen sániid dárogiel ja suomagiel skoviid vuođul. Dasa lassin leat mii buohtastahttán skoviid sátnečoakkáldaga guovtti dávvisámegielat máná sátnečoakkáldagaiguin, ja dainna lágiin válljedan guđiid sániid váldit mielde skoviide. Vuosttaš deavdinvuorus lei váhnemiin maid vejolašvuohta lasihit sániid maid mánná atná ollu, ja mat eai lean skoviin. Sánit maid váhnemat árvaledje, leat dál váldon mielde skovvái.

Giellaoahpa oasi leat heivehan suomagiel skoviid vuođul.